NAN KI AYITI OU VLE VIV?
Se pa yon kesyon senp, se yon kesyon istorik. Se kesyon ki defini avni yon nasyon, responsablite yon jenerasyon, ak direksyon yon batay kolektif. Gwoupman Jenès Konsekan Ayisyen (GJKA) se yon mouvman nasyonal ki pran nesans nan konsyans ke okenn sosyete pa ka transfòme san yon jenerasyon ki òganize, fòme, epi detèmine pou pran desten li an men.
KIYES NOU YE
Gwoupman Jenès Konsekan Ayisyen (GJKA) se yon mouvman politik ak sosyal ki rasanble jèn ayisyen ki refize fatalite, refize dezòd òganize, epi refize yon sistèm ki ekskli majorite a. Nou pa yon reyaksyon emosyonèl. Nou se yon konstriksyon politik konsyan.
- chanjman pa fèt pa aksidan
- pouvwa pa bay, li konstwi
- libète pa deklare, li òganize
Nan yon kontèks kote Leta febli, kote enstitisyon yo pèdi kredibilite, epi kote jèn yo souvan itilize kòm zouti san vizyon, GJKA vini kòm yon estrikti ki:
- repolitize jèn yo sou baz prensip
- konstwi disiplin kolektif
- prepare yon nouvo klas dirijan ki sòti nan pèp la
ISTWA AK NESANS MOUVMAN AN
GJKA pran nesans nan yon moman kote kriz ayisyen an pa ka eksplike ankò kòm yon kriz pasajè, men kòm rezilta yon estrikti istorik ki pwodwi inegalite, depandans ak eksklizyon.
- kriz politik la se refleksyon yon kriz estriktirèl
- kriz ekonomik la se konsekans yon modèl depandan
- kriz sosyal la se rezilta absans jistis
Se nan analiz sa a GJKA bati fondasyon li. Li pa yon mouvman ki baze sou opòtinite elektoral. Li se yon mouvman ki baze sou nesesite istorik.
MISYON – VIZYON – VALÈ
Misyon
Fòme, òganize ak mobilize jèn ayisyen pou konstwi yon nouvo lòd sosyal ki baze sou jistis, egalite ak souverènte nasyonal.
Vizyon
Yon Ayiti kote pouvwa politik, ekonomik ak sosyal pa konsantre nan men yon minorite, men distribye nan enterè majorite a.
Vale
- Jistis sosyal
- Egalite
- Transparans
- Disiplin
- Angajman
- Solidarite
POZISYON IDEYOLOJIK
GJKA defini tèt li kòm yon mouvman pwogresis ki chache depase limit sistèm tradisyonèl yo.
Nou kwe nan
- Demokrasi patisipatif
- Redistribisyon resous
- Edikasyon kom baz liberasyon
- Oganizasyon kom zouti chanjman
Nou rejte
- Koripsyon sistemik
- Eksklizyon sosyal
- Dominasyon ekonomik minorite
- Politik san prensip